Monday, August 29, 2005

 

Skul met

Wanpela skul met bilong mi, i save stap long Tokyo, kam long Kyoto long haus bilong mi na mitupela raun wantaim.
Mitupela i skul wantaim long haiskul long Yokohama na pinisim skul long 1992. Mitupela i pinisim haiskul nau mi go skul long yunivesiti long Kyoto na em i skul long narapela yunivesiti long Tokyo. Mitupela i skul long narapela narapela yuni na mitupela i pinisim yuni tu, kisim narapela narapela wok na stap i kam nau, longtaim mi no lukim em.
Em i kam na mitupela i go raun long is sait bilong Kyoto: Kiyomizu-dera, Yasaka-zinzya, Maruyama kooen, Nanzen-zi, Tetugaku no Miti, na kaikai na dring bia na mekim.
Slip na tumoro, mitupela i go raun long Kurama-dera, na maunten i stap klostu long not sait bilong Kyoto. Long Jepen tu, i gat bikpela bus long maunten. I gat planti diwai. Raun raun i kam bek gen long insait long siti na mitupela i kaikai na dring bia. Pinis, long nait, em i go. Em i go bek gen long Tokyo long wok.
Planti skul met, mi save toktok gut wantaim, tasol nau mipela i stap long narapela narapela hap na mi no save long ples we ol i stap long en.

Tuesday, August 09, 2005

 

Mi laik go ya

Olgeta yia long 8 mun na 9 mun nabaut, mi save go long PNG. Long Jepen ol man save kisim longpela holide long 8 mun na 9 mun. Igat longpela skul brek i stap long dispela sisen tu. Dispela sisen ol kolim sama (summer) na mi ken tok olsem em taim bilong hot. Tru, nau san hot tumas na i no gutpela taim bilong wok o skul. Dispela kain taim em gutpela taim bilong lusim Jepen na go raun long ples long PNG. Mi no save raun raun long narapela narapela ples long PNG. Mi mangi Simbu ya, mi save raun insait long Simbu tasol.
Nau long 2005 tu mi tingting long go long PNG tasol mi bisi liklik na nogat moni tu bilong go raun long PNG. Mi stap yet long Jepen. Mi save olsem ol brata susa i stap long ples ol i wetim mi long kam na stap wantaim ol, tasol mi no nap go. Mi save olsem ol lain i stap long Mosbi ol ting olsem mi bai kam. Mi wari tru long ol. Ol bai ting olsem mi dai pinis o mi gat sampela problem nabaut, tasol nogat. Mi stap orait. Mi stap orait tasol i gat problem long taim na moni tasol.
Olsem na mi laik putim liklik toksave long hia. Mi laik go ya, na yes, mi bai go, tasol i no long nau. Ating neks yia long 2 mun o 3 mun samting, bai mi go raun long Simbu. Ol mangi! Wet stap! Bai mi kam.

Saturday, August 06, 2005

 

OK, yumi stat!

Mi wanpela mangi Jepen, ol Papua Niugini save kolim mi Glmai, em nem bilong ol Simbu. Stori bilong mi yet bai mi raitim bihain. Nau mi laik wokim liklik toksave long dispela blog (kain pes olsem, ol save kolim blog ya).

Mi save raitim blog long narapela narapela tokples. Pastaim mi yusim wanpela blog tasol na mi raitim long tokples Jepen tasol. Wan wan taim mi raitim Tok Pisin nabaut, ol sampela Jepen i paul na askim mi. Mi miksim narapela narapela tokples long wanpela blog na ol paul. Olsem na mi laik wokim narapela blog long hia blong Tok Pisin. Nau mi gat planti blog.

Ol brata susa i stap long Simbu na Mosbi na olgeta hap kona long Papua Niugini yupela i ken lukim na sapos yu tingting long putim sampela toksave blong mi ritim, yu ken raitim long "comment" danbilo na yumi ken toktok i go kam.

Em tasol. Tenkyu.

This page is powered by Blogger. Isn't yours?